Plädoyer für Toleranz an der Basler Fasnacht 2010

Spale Clique 1927
JG-Fasnacht 2010


Lustig ist das Zigeunerleben!?
http://spale.ch/index.php?option=com_content&view=article&id=162:jgfasi2010&catid=77:fasnachtaktuell&Itemid=125#zeedel

Ein paar filmische Eindrücke

"Zeedel jungi 2010":
http://www.youtube.com/user/spaleclique#p/a/u/0/jRB5fVAN3oU

"SOMM 2010 (Zeedel Stamm)":
http://www.youtube.com/user/spaleclique#p/a/u/1/s1VCr-3BRUU

"Spalesippe - Zeedel 2010":
http://www.youtube.com/user/spaleclique#p/a/u/2/tWubgWKIeJU

Zigyynerinvasion! Es vergoot efang kei Daag mee, wo nit irgendwo e Zigyynerbandi duet yybräche... Kum leen sich die Sippe im Elsass niider, styyge z Basel d Yybrüch rasant aa. Am Bahnhof bättlets efangs an jedem Egge und in dr Freye gseesch alpott Zigyynermusikante. Die Meinig wird dir ämel vermittlet, wenn divärsi Schwyzer Zyttige duesch lääse.
Mir Junge hän-ys gfroggt, eb me das alles so eifach ka pauschalisiere. Ischs denn wirklig eso, as d Zigyyner eifach us Plausch dien yybräche? Nämme d Yybrüch wirklig zue, wenn e Sippe in Saint-Louis duet cämpe? Oder gseet d Realität andersch us?
Schlussändlig gits nur ebbis: dr Sälbschtversuech! Drey Dääg lang sin mir Junge als Bättler, Yybrächer, Kesselfligger, Woorsager, Schueputzer, Mässerschlyffer und Stroossemusikante unterwägs. Fazit wird spöter zoge...

Spale Clique 1927
Jungi Garde 1948

E Nääbelmeer liggt ibrem Land, 
d Kälti raubt eim dr Verstand, 
es dämmeret und bald isch Nacht. 
Dr Vollmond wo vom Himmel lacht 
nimmsch nur als hälle Flägge woor. 
D Adwäntsszyyt die stoot kurz bivoor… 
E Liebesbaar goot Hand in Hand 
am Wiehnachtsmärt vo Stand zu Stand 
und spändet bi dr Heilsarmee. 
Äänis, Glieewyy, Jagatee 
und Zimmed ligge in dr Luft! 
Sorge fir e bsinnlig Duft. 
Doch s goot nit lang und die Idylle 
duet mit Gstichel sich erfille. 
Vo wytem gheersch e Schuggerkaare 
wien-är dur d Falknerstrooss duet faare. 
S Blauliecht wirblet uf em Dach, 
sy Horn sorgt fir dr neetig Grach… 
Dr Schugger Heinz vom Doorebach 
hoggt vorne grad bim Häntschefach; 
schreyt zem Chauffeur lut "AVANTI
mir schnabbe die no inflagranti!" 

Dr Meier Ralf het alarmiert… 
E Maitli haig grad spioniert 
wo me bim Noochbershuus am beschte 
s Yybruchswärggzyyg kenni teschte 
und syg bim Balggong findig worde. 
Drufabe syg e ganzi Horde 
vo Kinder in däm Huus verschwunde… 
"Alles was die dert hän gfunde 
hän syy mitgnoo imne Sagg. 
Gottverdammts Zigyynerpagg!" 
Dr Disponänt uf dr Zentraale 
lyydet bi däm Weertli Gwaale: 
"Dos wär denn Yybrüch Nümmer säggs… 
E Patruoille isch scho ünterwägs! 
I düe äu Saint-Louis informiere 
die kenne se denn inhaftiere. 
Zigyyner sett me grad flambiere
wenn die üns ständig schickaniere!" 

Wo nach satte acht Minutte 
die drey Basler Schugger-Pflutte 
vor em Wasserturm dien lande 
het dr Wachmaa schnäll verstande 
wo genau s Problem duet ligge. 
"Die selle schnäll Verstärggig schigge" 
meint är zem Schugger-Aspirant 
"Zigyyner sin derfir bekannt 
as syy nit lang diskutiere 
bevor syy dir ains betoniere." 
D Verstärkig kunnt, syy lamentiere 
was ächt alles kennt basiere 
und eb mes wirklig will riskiere 
die Kinder ooni Schutz z duschiere 
denn schliesslig heig die ganzi Sippe 
mit Sicherhait jo d Säuligrippe. 
Syy nämme Helm und Kevlarweschte 
dien näbebyy no d Waffe teschte 
und stirme denn mit achtzää Maa 
das Huus, as niemerts flichte ka. 

Siibe Kinder us em Oschte 
bringt me gschwind zem Claraboschte 
zem se derte denn z befrooge. 
Dr Dedeggdyyf isch schyynts uf Drooge 
wo-n-är zem Balkan-Setzlig hoggt 
und en mit luter Stimm befroggt: 
"D Bewyyslaag isch fir di nit guet! 
Zää Kischte voll mit Diebesguet 
zem Abtransport barat im Garte… 
Säggs Kumpane wo dien warte, 
zwai Fingerabdrigg an dr Wand, 
dr Gaissefuess no in dr Hand. 
Kuum diend yyr im Elsass cämpe
hän mir Bebbi ständig lämpe, 
well yyr Zigyyner statt go schaffe 
lieber geend go zämmeraffe 
was eigetlig nit eych duet gheere. 
Am maischte aber duet mi steere 
as me jede diffarmiert 
wo dä Zuestand kritisiert! 
Ych fordere fir jede Goof 
vierzää Monet Gfängnisstroof!" 

Dr Balkan-Mogge foots a gruuse, 
denn hauts em dr Nuggi uuse: 
"Bis mol ruhig du Wasserbiffel! 
Du verteilsch do inne Riffel 
als wärsch du Gott in corpore! 
So vyyl Dummhait duet doch wee. 
Als Sinti wirsch - ganz ungeniert 
ständig kriminalisiert… 
Verhasst, verfolgt syt dausig Joor 
well fremdi Fötzel sin e Gfoor… 
Als Roma muesch dr d Arbet sueche! 
Albott dien sy uns verflueche 
well mir umeraise dien. 
As mir aber faare MIEN 
well mir nienets DERFE schaffe 
duet bis hytte niemerts raffe! 
So reisisch als Stroossemusikant 
oder Pfannefligger iber s Land. 
Rächne, lääse oder schryybe 
mien die Maischte denn lo blyybe 
well Schuelbildig liggt numme din 
fir Styyrzaaler wo sesshaft sin. 
Zem dä Deyfelskreis blockiere 
und d Zigyyner z integriere 
bruchts - statt Schugger-Ignoranz 
gsellschaftligi Akzeptanz. 
In däm spezielle Fall jetzt do 
wär-y denn scho grausam froo 
kennt-y langsam wiider goo… 
Dr Sachverhalt isch nämmlig so 
as ych und mini säggs Komplize 
fir e Ziigelfirma schwitze!" 

Die Vorurteil die hän ys gschoggt 
drum hän mir Junge uns halt gfroggt 
isch s Zigyynerlääbe lässig? 
Oder isch das Liedli Essig? 
Fir d Antwort existiert kei Buech 
do gits nur ains - dr Sälbschtversuech! 
Mässerschlyffer, Muusikante 
Stroossekinschtler, alti Dante 
Bättler, Korbflächter, Schlawyyner 
e ganzi Sippe vo Zigyyner… 
E kunterbunte Mummeschanz 
als Plädoyer fir d Toleranz.